2016 西遊紀行鐵路遊 - Day 4.2 大和戰艦篇

因為有人話對日本軍艦唔熟悉，所以呢篇遊記要請槍，由今次行程既幕後主腦大小姐代筆。

請各位師兄師姐多多指教

* * * * * * * * * * *

今次來到呉市，相信對日本二戰史有認識既都唔會對呢個地方陌生。二戰期間大日本帝國海軍轄下有四個鎮守府(即係根據地)，分別係橫須賀鎮守府(橫鎮)、呉鎮守府(呉鎮)、舞鶴鎮守府(舞鎮)同佐世保鎮守府(佐鎮)。呉市就係呉鎮的所在地。而呉海軍工廠亦建造過多艘艦船，最出名既除咗有赤城號航空母艦同當年被認為係海軍象徵既長門號戰艦(因大和型戰時係最高機密)外，就係大和號戰艦。

大和號戰艦係日本最具代表性同為人熟悉既二戰戰艦，用盡日本最高技術秘密建造，係史上最大型同當時最精銳既戰艦。佢同佢既姊妹艦武蔵一直被視為可以扭轉局勢既最後王牌，一直備受期待，甚至有不沉的戰艦既稱號。

諷刺既係....跟據歷史，被譽為不沉既船隻通常都冇乜好結果。大和同武蔵兩姊妹生不逢時，見証住戰鬥主力由大艦巨炮既戰艦變成航空母艦，連建造中的大和型三號艦信濃都要隨戰局變化改裝成艦空母艦。而大和同武蔵最終都缺乏出戰機會。

由於大和號"食多過做"，即使戰局惡化仍然冇份參戰，再加上艦內優越既居住性(艦內甚至有雪糕機)，當時甚至被其他海員及陸軍揶揄為大和旅館。

最後，大和武蔵出戰馬里亞納海戰及雷伊泰灣海戰，仍然改變唔到兩戰既敗局。武蔵喺雷伊泰灣海戰被美軍強烈轟炸9小時後沉沒。而大和其後出戰坊之岬海戰，由於有擊沉武蔵既經驗，美軍集中攻擊大和左舷。2小時後大和發生大爆炸並沉沒，永眠於海底。

大和爆炸沉沒一刻

入場先去看特別企畫展 日米最後の戰艦展

会場內不准拍照。主要紀錄日軍及美軍二戰最後的戰艦，分別係大和號同密蘇里(Missouri)號。美國戰艦實在唔識，所以密蘇里號部分都係望下就算。

日本方面，除咗展示大和相關資料之外，亦展示了大和生還船員的手記。其他船艦包括天城、信濃的設計圖，仲有長門型所用的41cm主炮內部展示。

大和博物館標誌 - 1/10大和模型

跟據館內介紹，由於大和係秘密建造，留落嚟的相片同設計圖都唔多，部分細節無從參考。由2005年開館至今，呢個大模型已經修改過200多處地方。

要同大模型影相，呢度有工作人員可以幫手合照。

主炮台、對空炮台、煙囪及電探

偵察機

連合艦隊司令山本五十六，雖身為司令但因認識到日本無法支持長期戰爭而堅定反戰。最後因美軍成功解讀到寫有山本行程的日軍電文而被暗殺。於2011年有套關於他的電影上畫，2014年在香港亦有上映。

大和型二號艦 - 武蔵

展示館內 - 有介紹呉鎮同海軍工廠的設立過程，一戰二戰時代及戰後人民生活

呉鎮設立過程

前蘇聯戰艦的揚錨機頭

戰艦金剛，由英國船廠建造。雖然二戰時期已算是高齡艦，但因其作為高速戰艦的特性，仍然是其中一艘主力艦，是金剛型四艘戰艦中最活躍的一隻。最後於雷伊泰灣海戰後，回航時被美軍潛水艦的魚雷擊中，沉沒於台灣基隆市北方。

金剛鍋爐

日本海軍的艦名命名方法

戰艦用舊國名，如長門、陸奧、扶桑、山城、伊勢、日向、大和、武蔵及加賀(原設計為戰艦，後因華盛頓裁軍條約決定廢艦。其後關東大地震，天城因無法修復而廢艦，由加賀取代改建做航空母艦)。

巡洋戰艦及重巡洋艦(或稱一等巡洋艦)用山名，如金剛型戰艦(包括著名既比叡山，榛名山)。天城型(天城及赤城因裁軍條約改建做航空母艦)。京都既賞楓勝地高雄山。於橫手有過一面之緣既鳥海山等。

輕巡洋艦(或稱二等巡洋艦)以河川命名，如去年年頭曾去過既北上川同今次旅程最尾會到達，位於福岡既那珂川。

大和型三姊妹：大和 武蔵 信濃

大和採用既技術介紹

大和潛水調查打撈物

軍事重鎮 呉市軍事設施分佈圖

日本最為人熟悉的航空母艦赤城，與加賀編成為第一航空戰隊(一航戰)，係南雲機動部隊旗艦，曾經參與珍珠港戰事。最後因日軍暗號被美軍識破，在中途島戰役同加賀、蒼龍及飛龍一同沉沒，成為太平洋海戰最大轉捩點。

二戰時的海軍象徵長門，同姊妹艦陸奧同為Big seven之一 (當時世上七大戰艦)。1928年4月9日曾經帶領部隊到香港作5日親善訪問。市民可以登上長門參觀。終戰後被美軍接收，同包括德國的歐根親王號及日本的酒匂等其他艦船作核爆實驗(十字路口行動)。最後經歷兩次核爆試驗4日後在深夜靜靜沉沒。長門係Big seven之中唯一一艘現存艦並成為潛水觀光地點。

長門下的軍旗係隸屬於第二航空戰隊(二航戰)司令官山口多聞少將的遺物。中途島海戰時乘搭飛龍號航空戰艦出擊。激戰之後，蒼龍同加賀先後沉沒，赤城大破炎上(即受到重創發生大火)，剩低飛龍奮戰反擊後受重創。其後加來艦長下達棄艦命令，船員撤退時佢同山口少將拒絕船員一齊離開既勸籲，山口少將亦只係在船員請求下將佢的軍帽同軍旗交給船員作為道別。其後飛龍由日軍雷擊處分，與山口少將同加來艦長共沉海底。

後面既係零式水上偵察機

遠至呉市亦見到廣島原爆

離開展館，大和模型既另一邊就係大型資料展示室

九三式魚雷、二式魚雷。最右邊係特攻魚雷回天。日本特攻隊其中一樣自殺式武器。設有駕駛倉，可以用人手操控的魚雷。

特殊潛航艇「海龍」(後期量產型)

1:1零式戰鬪機六二型，可惜冇得上去試坐

甲標的，有玩日本艦隊遊戲「艦隊これくしょん」既話一定會認識呢個最常用既裝備

各種炮彈展示

(左起)大和型用46cm九一式徹甲彈、46cm三式彈、46cm九一式徹甲彈(彈體)。長門型用41cm九一式徹甲彈。金剛型、扶桑型及伊勢型用35.6cm九一式徹甲彈、彈管、彈體及火藥罐。三笠(現存於橫須賀作紀念艦)用30cm主砲彈。重巡洋艦用20.3cm徹甲彈及火藥罐。12.7cm高角砲彈同25mm機統彈，背後係重巡洋艦青葉的主炮身。

大型資料展示室

離開展示室，走廊上擺放左唔少二戰軍艦模型。
戰艦扶桑是比起大和型更充滿不幸氣息的艦船。作為日本第一艘獨自設計的超弩級戰艦，設計過分重視火力，結果防禦力差同性能唔穩定。二戰爆發時整體設計已經過時，被譏為失敗品，長期待機同作為訓練艦用。跟姊妹艦山城在雷伊泰灣海戰時被編入西村艦隊，最後除驅逐艦時雨之外，西村艦隊係呢場海戰全軍覆沒。

以京都高雄山命名既一等巡洋艦高雄

介紹造船技術展示室，有少少似科學館

臨走前再高炒一張大和

　題外話：呉市除了有大和同長門出名之外，仲有另一架隸屬呉鎮守府，被稱為「奇跡之驅逐艦」的雪風驅逐艦都非常出名。雪風參與過16場以上的主要作戰，但從冇受過大傷害，幾乎以無傷狀態迎接終戰。同另一架以幸運著稱的驅逐艦並稱「吳之雪風，佐世保之時雨」(亦有另一個名叫死神.....因為同佢一齊出擊既艦船都.....)。最後成為終戰唯二存活的日本艦船，作為賠償艦賠償給中華民國，改名為「丹陽號」(另一艘係有不死鳥之稱既曉型驅逐艦「響」，賠償給前蘇聯)。移民台灣後，繼續保持好運，直至1966年因機件老化除役。在1969年遇上暴風雨，艦底受損入水，解體處分。歸還船錨同舵輪給日本，現存係江田島舊海兵學校內，車葉同艦鐘存放台灣左營的海軍官校。

海上自衞隊呉史料館 ◄ Index ► 大和ミュージアム