2014 北海道16天初秋自駕遊 Day 2.1 - 北海道到著、Nissan 租車

2014.9.24 (陰) 新千歲空港→道の駅ハウスヤルビ奈井江→旭川

上一篇講到喺酒店食完早餐後，

坐酒店巴士去成田空港。

因為第一次坐國內線，去左國際線搵Jetstar，

梗係搵唔到啦，又要問人先知要去國內線。

跟住指示牌行，行到好遠先見到Jetstar。

要自己check in同埋print boarding pass，

不過好簡單，只要入啱Ref code，對清楚資料，

確認完print張登機証就可以去寄行李。

又係要搭巴士上飛機

銀色機身幾型下喎

飛咗個幾鐘已經到咗北海道上空

天色嘛嘛，灰灰暗暗

有架螺旋槳飛機，後面果架係Air Do

攞完行李就去搵租車公司，又係要行好遠先到。

到咗柜台第一時間攞張booking email出來，

個姐姐搵咗一輪都搵唔到，

唔係冇咗嘛，係就大鑊，呢十幾日點算呀! ( >﹏< )

由頭摷到尾，由尾摷返上頭，終於搵到 ( >__< )

跟住攞個國際車牌俾佢，

個姐姐睇咗一輪就同我講"Sorry, expired"，

有冇攪錯，個國際車牌我地5月去台中先攞架，

亞姐你識唔識睇架 。

於是我指住個日期話俾佢知，

呢個係開始日期唔係到期日，

由5月1x日開始有效一年架，
咁佢即刻好唔好意思講Sorry。

之後就俾咗個number我，叫我地坐係對面等車。

日產都唔係細公司，唔通未租過俾香港人，

連香港國際車牌都未見過 (╯з╰)

等咗一陣就有車，佢間車行離機場都幾遠下，

好似坐咗好耐先到。

又喺車行辦咗一輪手續，比埋錢就去攞車。

我地個Plan係冇指定車款，租車公司安排咗架Note，

車尾廂唔大放唔到兩件大行李，

要㩒低後座兩個位先放到，好彩我地得兩個人，

多兩個就千祈唔好揀呢款車。

就係呢位姐姐同我地一齊驗車，驗完車又教我地用個GPS，
冇問題姐姐就同我地拜拜。
上咗車，但仲未可以出發，
又要插USB义電器、又要裝手機car mount，
最後要插USB播歌，但係搵唔到USB位，
又要走返入office搵頭先個姐姐出來幫手先搵到。

開車前影低行駛里數，45408km都行咗幾耐下。

還車時係 47770km，即係十三日行咗 2362km，

平均一日行182km 左右。

同架車裝好身已經過了12點半，set好GPS，
另外仲用埋Google map，終於可以開車。
但係剛開車出去，完全分唔到方向，
都唔知轉左定轉右，結果又行錯路要調頭，
好彩周圍都冇車，可以調頭唔使兜路，
跟返條正確方向，正式出發。

~ ~ ~ Index ~ ~ ~

上一篇 : Day 1.5 - 東橫Inn成田空港

下一篇 : Day 2.2 - 道の駅ハウスヤルビ奈井江、旭川