2014 北海道16天初秋自駕遊 - Day 14.3 二見吊橋、北のたまゆら桑園、札幌

定山溪係最受失相事件影響，

呢部份相就只有這幾張。

始終定山溪都係較熱門旅遊點，

要再來就算唔自駕都非難事，

或許下次來住番一晚作補償。

遊完豊平峽，駛回去定山溪，

周圍都好靜冇人又冇車，

我地求其搵個位泊低架車就去行二見公園。

喺河邊見到有幾個人在寫生，

我地就喺河邊影紅葉。

跟著沿著河邊行去二見吊橋，

橋上亦有人在寫生。

影完相喺附近逛咗一陣，影下河童，

跟著就行咗去岩戸觀音堂。

岩戸觀音堂旁邊有個足湯，

剛好有幾個人浸完腳。

我地都唔客氣浸下對香港腳先，

初時冇乜人，浸浸下越來越多人，

差啲唔夠位坐。

浸完腳，行咗去定山泉源公園，

呢個公園都有足湯。

係附近逛多一陣就回程返札幌。

回程途中經過見到有間Aeon，

入去兜咗個圈，今日仲未食午餐，

於是買咗兩個便當食。

食完簡單午餐繼續行程。

下一個行程唔係去睇風景，

而係浸日歸溫泉。

天然温泉やすらぎの湯 北のたまゆら桑園

(mapcode 9 549 266; tel 011-661-3232)

呢度個停車場好大，不過嚟到時已經泊滿車，

兜咗個圈先等到位。攞齊毛巾入去囉。

門外相係離開時才影的。

入去要先除鞋

自助售票機，大人440yen，

好低玩架，呢度絕對可以翻兜。

揸車嚟要記得攞張泊車飛嚟前台過機，

咁就可以無料泊車。

浴場外面有休息地方，再入去係餐廳。

呢度食野好平好抵。

呢度女湯都係用"姫"字，同鶴雅一樣，

而男湯係用"殿"字，唔知鶴雅係唔係都一樣呢？

入到去幾乎嚇咗一跳，裡面好噓冚，

從未試過咁多人浸溫泉。

內湯有幾個風呂，最特別係個電氣風呂，

個風呂有部份係水力按摩，

而最側邊係有電流，將手放喺水度，

會感到有電流過。如果靠近電極，

個感覺仲正，好似玩緊脈衝機咁，

仲係調節到最強添。

露天風呂都有兩個，一個天然石風呂，

另一個係對住大電視，可以一路浸

一路睇電視，不過啲水唔係好夠熱。

售票機隔離有部量血壓機，

浸完溫泉量下血壓先，上下壓都正常，幾好喎。

我地仲喺餐廳食埋野先走。

今日係最後一日揸車，

離開桑園先去酒店放低車上所有東西。

跟著就駛去隔兩條街嘅日產札幌駅店。

還車前影埋最後一張相，

就要同相處咗十三日嘅拍檔分手喇。

車行職員收車時只係望下架車，

之後睇埋個車錶，簽番個名就攪掂，

真係快過打針。轉個頭就見個職員揸走架車。

個職員手車好辣，見佢好快入後波倒車,

跟住一個u-turn就絕塵而去。

行車最後記錄47770，攞車時係45408，

即係呢十幾日行咗2362公里。

無車代步，唯有用番十一號車。

我地將相機都放在酒店，

所以相全部係用手機拍攝。

行行下去咗時計台，

始終覺得晚上嘅時計台好陰森。

跟著好快就到咗大通公園，

循例都要影下電視塔。

最後去狸小路買手信，我地行到呢間店舖買野，

當時裡面有團強國人。我揀完手信去俾錢時，

店員問我是中國團還是台灣團，我就答佢係中國。

跟著佢又問我有冇唔知咩咭，當時聽唔明佢講咩，

就答咗冇，佢就同我講打9折。

另一個顧客就問有咭有咩分別，

職員話有咭可退稅。

後來諗返起可能佢係問我有冇銀聯咭。

行行下收到大小姐whatsapp，

叫我地去激安幫佢買野。

係激安買完野就去味の時計台食拉麵。

呢間係大小姐極力推介，我地係第一次嚟。

呢道啲拉麵的確唔錯，

我地第二朝仲再嚟買咗幾包拉麵返香港。

今日又去咗好多地方，食完麵就返酒店休息。

~ ~ ~ Index ~ ~ ~

上一篇 : Day 14.2 豊平峽

下一篇 : Day 15.1 大通公園、舊道廳