2017年6月4日星期日

2017富士箱根逍遙遊 - 上網咭及租車篇


~上網咭及wifi egg~
大小姐4月尾去東北追櫻時順便幫我們淘了上網咭,但訂開的店已經沒有Docomo,轉了softbank,大小姐用後報告是接收良好。我們把sim放入wifi egg用,但就非常緩慢。初時以為是softbank網絡問題,後來在最後一天把sim放落手機試,速度明顯快了,估計是wifi egg唔support softbank 4G,由4G跌落3G變了龜速。

另外,4月初見到KLOOK客路 (link)的wifi egg只是12元一天(已加至13元一天,但第一次租有10元優惠),五天都只是60元,又訂了一部試試。用後報告是全程接收良好。在機場抵港大堂A區對面取機及還機,所以非常方便。我們乘凌晨機,當晚9點後便可以取機(不收當晚租金)。當晚很多人排隊取機及還機,取機時要另外付500元按金,還機時退回。取機手續亦很簡單,只需在現場連接到wifi egg便可離開。

~租車篇~
在Jalan搜尋酒店時,見到有租車coupon。未試過Jalan租車,又找到合適plan,於是就經Jalan訂了架Toyota Vitz。
車租24,840+免責補償4,320+ETC咭324+異地還車2,160-扣除Jalan折扣2,000,共29,644yen。
由於經Jalan訂車,只收到Jalan的確認電郵,無法用回覆電郵要求ETC咭。後來得到討論區教路,可以直接跟Toyota溝通,但巢鴨店只有電話及傳真,又是白金秘書出場的時候了。透過白金秘書預留了ETC咭及後來改早了取車時間。
今次全程走高速公路,買路錢7,990+富士山有料道路往復料金2,060,共10,050yen。4天走了561公里,入了兩次油,第一次入了3000yen (22.56L@133yen),第二次還車前自助入油入了1810yen (14.85L@122)。兩次共4,810yen。由於不是混能車,大老爺說這架車好像比較大食油,頭二天已經用了三分一缸油。入了37.41L油,平均1L行駛15公里,唔知算唔算食油呢?
今次的酒店全是泊車無料,景點及購物區泊車費共1,230yen。
總計4天自駕遊費用是45,734yen,如果可以多兩個人分擔就很抵玩了。
這架Vitz的GPS入Mapcode只有8個數字,但我一向用的mapcode都是9個數位,幸好我一向都是以Google map為主,GPS為副,所以對我影響不大。


已行駛了23513公里,還車時是24074,4天共行駛了561,平均一天行了140公里,相當輕鬆。


這部車起步時引擎聲頗大,這亦是大老爺覺得這部車比較大食油的原因。另外大老爺還覺得部車“唔老嚟”,因為有幾次開車時險些發生意外。幸好最終都平安大吉。“唔老嚟”事件發生了四次,只講其中一次事件。話說第二天趁天晴又有時間,於是近黃昏時駛去山中湖。行駛途中我及司機在毫無先兆下同時被一度強光直射雙眼,眼前一白,完全看不見前面景象,維持了約一秒,而我們當時都有帶太陽鏡,幸好恢復得快,否則就大件事了。

28 則留言:

  1. 我見Toyota官網普通Vitz屬P1 Class得1,000cc左右,會唔會唔夠力,因為我租開P2 Class有1,300cc-1,500cc
    4月我哋又係租咗Vitz,不過係新款混能車,有1,500cc,7日車租扣2,500円mileage要接近6萬円,但相比普通車的確慳油,行咗848km都係入咗兩次油但1公升可以行到21.285km
    今次我都有借ETC咭不過租車時無預留,去到攞車先問佢,記得有次响東京品川攞車,無問佢又竟然佢問我哋要唔要借,咁咪借埋
    揸過幾次混能車覺得不只慳油仲好靜,有時撻著車都唔覺,不過價錢就比較貴,今次都係因為P2可以俾到嘅指定車款唔啱心水先至改租
    試過有次Toyota俾咗架行咗6萬幾km嘅Sienta,由開車至熄車都好嘈,尤其上高速,嘈到要較大個GPS音量先聽到

    回覆刪除
    回覆
    1. 我都無留意原來租咗P1車,我一向租開P2,不過今次因為要去幫阿仔攞野返香港,貪近所以揀咗巢鴨店取車,變想少咗Plan揀。Vitz力都夠,我哋楂咗上五目合同大涌谷都夠力,可能得兩個人同唔多行李,不過始終覺得幾大食油。
      第一次渣混能車唔知撻車靜,撻著咗車都唔知,仲以為架車撻唔著XDD
      平時租車都有要求借ETC咭,貪方便唔使下下俾現金。

      刪除
    2. 你响香港租個wifi egg係咪得部機,要自己另買sim card放落去?

      刪除
    3. 租機嗰部係連sim card,我自己嗰部就要每次買sim card放落去。

      刪除
    4. 連sim card無限定有限?

      刪除
    5. 佢網頁無寫有冇限,不過我地夜晚會上網睇電視,唔覺速度有慢咗。或者可以打電話去問下佢。

      刪除
  2. 此留言已被作者移除。

    回覆刪除
  3. E, 個 wifi 旦係租定係買?

    回覆刪除
    回覆
    1. 我地本身仲有一隻wifi egg

      刪除
    2. e家我多數去 studi a 買佢地果張 ez nippon 六日無限速無限量插去 wifi 旦度用

      刪除
    3. 6日229都幾貴,我將咭加埋蛋都係120蚊。我地唔使用無限plan,有2G都夠我地夜晚煲埋劇XD

      刪除
  4. 點解會有強光﹖ UFO﹖

    回覆刪除
    回覆
    1. 邊得嚟咁多UFO,應該都係斜陽光,不過渣咁多次車都未試過俾陽光射到4隻眼都一片白。

      刪除
  5. 見你咁計我又睇吓自己今次租車,你租架車可能應該幾大食,我今次租咗兩架車.
    第一架車1800cc 7日,入咗兩次油總共58L行咗742km.
    第二架車2000cc 1日半,剩係還車時入咗8.6L行咗76km.

    回覆刪除
    回覆
    1. 1000cc車,1L先行得15公里,好大食呢-_-#

      刪除
  6. 成日見人話揾白金秘書,實在係咪真係有求必應呢? 訂酒店房book餐廳呢啲係咪完全無難度?

    回覆刪除
    回覆
    1. 我試過搵白金秘書訂鶴之湯、預約酒店駐車位同夕食時間、餐廳訂枱、預約摘士多啤梨等,係唔係有求必應就唔知,但就未試過托手踭XD

      刪除
    2. 我始終唔放心俾白金秘書做,驚佢哋做漏做錯,都係自己send email去book好D,so far又未遇過只得電話同fax嘅餐廳同旅館,不過有D如果你寫日文佢哋會覆得快D,咁簡單嘅日文booking我都handle到

      刪除
    3. 咁如果有email既,我都會叫阿女幫我用日文book。不過要打電話就會用白金秘書。我第一次訂鶴之湯時只有白金秘書回覆短訊,冇confirm email收,所以果次其實都有D驚架,好彩去到打電話約送迎車時,佢都搵到個預約。

      刪除
    4. 英文唔覆,日文即覆經常發生。

      刪除
    5. 唔識日文真係頭痕架=_=

      刪除
    6. 因為仲有好多日本人唔係好識英文,尤其係鄉下地區,所以咪唔覆囉..
      有D細間旅館直情唔招待外國人因為無人識講英文
      好多時响日本住酒店或旅館,check-in時一開始會問你"日本語大丈夫?",如果你答"大丈夫"的話佢哋會放心好多

      刪除
    7. 所以而家如果得我兩公婆去日本,我係唔會住民宿,溫泉旅館都盡量揀大間同出名D既

      刪除

多謝你的留言, 如果想以電郵通知我們的回覆, 請按「通知我」,我地會儘快回覆。