2014 北海道16天初秋自駕遊 Day 4.5 船長の家

離開能取岬，繞過能取湖時已經是漆黑一片了，

沿著國道238直駛位於常呂町既船長の家
(mapcode 525 732 723; tel 0152-54-1111)。

雖然已經係google行過船長の家，

知道路口有個招牌，但馬路完全冇燈，
兩旁又少民居，只靠車頭燈照明，

連路口都睇唔到，結果又錯過路口。

GPS顯示就係附近，唯有u-turn慢駛，

終於搵到入口，係門口卸下行李才泊車。

check in完上房先，仲未夠鐘食晚餐，
影下間房先。

訂船長の家似乎冇得揀房(民宿篇 一)，
１泊２食　お１人様　8640円 （税込）。

入到房間有一細小玄關，喼後面係廁所。

二人房面積唔大，其實唔太鍾意住和室，

年紀大了，坐地下唔舒服啊！

第一次見斜放既坐廁，民宿有大浴場，

所以冇用過浴室。

在房間聽到有廣播聲，應該係夠鐘食晚餐了。

立刻落去夕食會場食期待已久既豐富海鮮大餐。

今日未滿室，會場仍有空枱。

枱上放有名牌，我地張枱喺會場最入面。

兩位客人坐四人枱，大部份食物已經放在枱上，

所以最好提早少少去會場。

最吸引目光就係兩隻巨蟹

另外仲有兩隻毛蟹

其他食物都是細細碟，但碟數多，

跟本無法食清光，相左邊上面果碗係魚生飯，

原封不動冇食過，太浪費喇 -_-#

刺身類有魚，蝦，魷魚，帶子……

呢碟係shabu shabu嘅

仲有兩個煱，一煱係蚌，一煱係蠔

蠔好細粒，嘛嘛地

螺肉，後面藍色碗係蟹肉蒸蛋

除咗枱上食物，陸續還會加食物，

真係點可能食得晒呀！

枱面食物清得七七八八，開隻蟹嚟食，

隻蟹好多紅膏，好正。

但老人家已經超標唔可以食咁多膏喇。

食咗少少已經食唔落，結果打包了三隻半蟹。

有個嬸嬸會幫你打包，跟住比個號碼，

明早去對面馬路間舖攞返。

佢仲俾個中文牌我地睇，

寫咗蟹容易變壞要一日內食。

我地早有準備帶了保鮮袋，

結果幾隻蟹成為之後兩日午餐。

食飽飽返上房休息一陣就去浴場，

今次冇帶手機，所以冇相睇。

浴場比Dormy Inn內湯細，

但又比Super Hotel大。

可能我早入去，裡面冇人，

浸完離開時在走廊就遇到幾個香港客入去，

有時唔好話強國人嘈，港客一樣好嘈，

幾個人你一句我一句，

由走廊頭嗌到走廊尾，真失禮。

船長の家Lan同wifi都冇，bmobile又收得差。

冇得上網，唯有出外面行下，

外面黑漆漆一片，睇咗一陣星星就回房瞓。

第二朝一早起身，執好行李就落去朝食會場。

朝食由7點半開始到9點

會場比昨晚夕食會場大得多

一樣是二人坐四個位，

食物又是已經放在枱上，

所以唔好爛瞓呀 (￣∇￣)。

朝食唔算太豐富，不過食晒都好飽，

唔夠仲有飯同湯。

食早餐時又遇到昨晚班港客，

坐正我地後面，又係七嘴八舌，

更過份是連粗口都出埋。

其實當時有影低佢地嘅醜態，

不過諗落都係無謂放上Blog度。

食完早餐，回房拿行李離開船長の家。

其實船長の家除咗大堆頭食物外，

真係唔太吸引，加上幾徧遠，

如果唔自駕應該唔會住。

昨晚來到時都天黑了，今朝補影相。

呢度就係入口，右邊有個牌，

但昨晚實在太黑，路邊又冇燈，跟本睇唔到。

當慢駛經過時，看到民宿裡有燈光，

再細心睇才見到屋牆身上船長の家幾個字。

昨晚打包的蟹就在對面馬路的海鮮市場取回。

對面綠色頂建築物係サロマ湖鶴雅リゾート，

同阿寒鶴雅同一集團，睇網頁好似幾唔錯。

我地隔離部車就係另一組香港客嘅，

攞完蟹就正式離開去下一個目的地北浜駅。

~ ~ ~ Index ~ ~ ~

上一篇 : Day 4.4 能取岬

下一篇 : Day 5.1 網走港、北浜駅