2014 北海道16天初秋自駕遊 - Day 6.3 屈斜路湖砂湯、コタン温泉(秘湯體驗)

到達屈斜路湖砂湯時，天色仍然昏暗，
好像快要下雨了。

屈斜路湖砂湯
(mapcode 638 148 316; tel 015-482-2191)，
平成26年9月28日到此一遊

右邊有幾隻天鵝船仔

今日遊客唔多，冇人幫襯，

左邊有成排船仔停晒係度。

湖邊俾人挖到一個個窿，挖窿係遊砂湯指定動作，

因為挖左窿之後會有溫泉水滲出，可以浸足浴。

我地早有準備帶咗毛巾，搵返個位浸下腳先。

初時都唔覺熱，再掘深啲就好熱下，

隻腳踩到落底就淥到紅晒。

浸完腳過隔離購物，呢度啲溫泉水可以飲。

行返去停車場先見到個牌，

原來呢度有野營場。

之前做資料搜集，知道屈斜路湖畔有不少露天溫泉，

コタン温泉 (mapcode 731 521 555)
係其中一個比較近砂湯，亦都比較隱蔽。

諗住去到冇人就試下浸野湯。

泊好車過去睇下環境先，初時以為冇人，

影左幾張相先發現有一對日籍夫婦喺度浸緊。

佢地兩個人喺左邊，我地就行去右邊影相。
可能見到有人，個日本女仕即刻包毛巾上水離開。
跟著個日本大叔赤條條咁走過嚟，
啋，大叔使唔使咁開放呀 (╯з╰)
佢見我地係遊客就用簡單英文講，
男仕呢邊，女仕隔離，跟著自己就坐低浸。
之後佢又講左一輪，
意思好似係話浸呢類溫泉喺日本好普通，
叫我地都試下。

見得佢一個人，反正又唔識嘅，
人一世物一世，死就死啦，
走返去車攞大毛巾。

左右兩邊都有更衣室，隔離有木架放衫。

大叔坐喺隔離，所以除毛巾落水後，

即刻匿喺水入面。(￣∇￣)

第一次浸全露天溫泉，對住無敵湖景，
外面水涼，裡面水熱，感覺真係好正。
個大叔見我地影相，

就走過嚟要幫我地影合照，

攪到我視線都唔知放喺邊度好 -_-#

之後隔離又有多咗個大叔同兩個後生仔，

等到最先個大叔同兩個後天仔走後，

我地都走人了。

中間個舊大石前面有水沖身，

沖乾淨著返衫，臨走前影多幾張相。

呢個牌介紹コタン温泉嘅歷史

左邊都有個牌寫咗入浴守則

影完起程去下一站 ―― 和琴半島

~ ~ ~ Index ~ ~ ~

上一篇 : Day 6.2 藻琴山展望駐車公園、硫磺山

下一篇 : Day 6.4 和琴半島、消失的摩周湖、道の駅摩周温泉