2014 北海道16天初秋自駕遊 - Day 7.3 摩周湖

離開双岳台，原本是直駛根室。
但昨天與摩周湖緣慳一面，心心不忿。
計算過時間，我們會先經過道の駅摩周温泉
再轉國道243，
而道の駅摩周距離摩周湖展望台
只是十幾分鐘路程，
來回時間加停留約一小時。
唔想有遺憾，決定再闖摩周湖。

今朝忘記記錄行車里數，十點才記得，
昨天早上從知床到現在開了298公里，
都行駛咗唔少路。

今次直接去較遠嘅第三展望台

(mapcode 613 871 602)，

因為呢度有無料停車場，

萬一又睇唔到都唔使浪費泊車費。

終於見到呢個咁神秘嘅摩周湖，

摩周湖周圍都係懸崖絕壁，

湖岸無法靠近，所以被稱為神秘湖。

順帶一提，呢個展望台有好多一隻隻，

好似蚊滋仔咁細會飛嘅小昆蟲，

仲迎面飛埋嚟，周身都有。

攪到唔敢講野，驚一開口佢地飛埋入口度，

所以一影完相就速速走人。

左邊睇過湖藍好多

中間係摩周岳，個倒影剛好遮住中島

右邊背光比較暗

行遠少少從側面望過去，

可以見到摩周岳倒影，

左邊小島就係中島

喺中間位置睇個湖又藍又清，

連白雲倒影都清楚見到

第三展望台仲可以望到硫磺山同屈斜路湖

跟著駛落去第一展望台

(mapcode 613 781 370)，

呢度停車場要收費，如果係硫磺山已比泊車費，

保留收據可以唔使再比錢。

由於昨天已經來過，

我都照比410円，跟著佢比張收據我。

當時我望到收據上註明兩日內可用，

我本能反應攞番昨天張收據出嚟，

收錢嘅阿叔見我有收據就比返410円我地，

但後來佢見到我張收據已經冇咗票尾就話唔得，

我正想比返錢佢時，佢又話OK叫我地駛入去，

咁又慳返410円。

昨天同一位置只可以睇到個牌，

今日就唔同晒，開心到狂影相。

終於睇到呢個神秘之湖，接下來係要飛車去根室。

~ ~ ~ Index ~ ~ ~

上一篇 : Day 7.2 双湖台、双岳台

下一篇 : Day 7.4 道の駅スワン44ねむろ、白鳥の風蓮湖